ಲೋಕಗತಿ ಬೇರೆ ತನ್ನ ಗತಿ ಬೇರೆ ನಿಜಗುಣನಿಗೆ, ಜಡಾಜಡ ಕರ್ಮಭೇದದಿಂದ ಲೋಕಕ್ಕೆ ಜ್ಞಾನಿ ಮರುಳು ಜ್ಞಾನಿಗೆ ಲೋಕ ಮರುಳು. ಈ ಭಾವಭೇದವ ತಿಳಿಯಲರಿದು ನೋಡಾ, ವಿಪರೀತಗತಿ. ನೋಡುವಡೆ ನಿಜಗುಣ ತಾನೇ, ಸಿಮ್ಮಲಿಗೆಯ ಚೆನ್ನರಾಮಾ.
ಲೋಕವ ತಾ ಹೇಸಿದ ಬಳಿಕ ತನ್ನ ಲೋಕ ಹೇಸುವಂತಿರಬೇಕು. ಲೋಕದ ಚಾರಿತ್ರ ಶೃಂಗಾರವ ತಾ ಹೇಸಿದ ಬಳಿಕ ತನ್ನ ಚಾರಿತ್ರ ಶೃಂಗಾರವ ಲೋಕ ಕಂಡು ಹೇಸುವಂತಿರಬೇಕು. ದೇಹಗುಣರಹಿತವಾದ ವಿರಕ್ತಿ ಜ್ಞಾನಕ್ಕೆ ಇದೇ ಯುಕ್ತಿ. ಈ ಯುಕ್ತಿಯ ತಿಳಿದಡೆ ಅದೇ ಮುಕ್ತಿ! ಸಿಮ್ಮಲಿಗೆಯ ಚೆನ್ನರಾಮಾ.